Facebook սոցիալական ցանցի օգտատեր Հովիկ Գյոզալյանը տեսանյութ է հրապարակել, որտեղ երևում է, թե ինչպես են սահմանամերձ գյուղում, իրենց տան բակում ուրախ պարող երեխաները սարսափահար փախչում ադրբեջանական կողմից հնչող կրակոցներից։ Մեկնաբանելով հրապարակած տեսանյութը` Հովիկ Գյոզալյանը Sputnik Արմենիային հայտնեց, որ այն նկարահանվել է ` սեպտեմբերի 11-ին, ՀՀ Տավուշի մարզի Վազաշեն գյուղում։
«Երեխաների պարը նկարելու ժամանակ սկսեցին կրակել։ Նրանց վախն աննկարագրելի էր։ Մենք` մեծերս, հասկանում ենք, որ սահման է, ու կրակոցներն անսպասելի կարող են լինել, բայց երեխաներն ուղղակի վախից դողդողալով ճչում էին»,- ասաց մեր զրուցակիցը։
Նրա խոսքով` քանի որ գյուղը սահմանին շատ մոտ է, կրակոցներն ավելի բարձր են լսվում։ Բայց, բարեբախտաբար, գյուղին ու գյուղացիներին չեն վնասել։
Ըստ Գյոզալյանի` վերջին ժամանակահատվածում ադրբեջանական զինուժը գյուղի ուղղությամբ կրակել է սեպտեմբերի 5-ին ու 11-ին։
Վազաշենի գյուղապետ Լորիկ Բադիրյանը ևս Sputnik Արմենիայի հետ զրույցում հաստատեց, որ գյուղի ուղղությամբ վերջին օրերին կրակոցներ են հնչել։
«Ես էլ եմ շատ լավ լսել կրակոցները, բայց երեխաների վրա չեն կրակել։ Ամբողջ գյուղում երեխաներ են։ Որ ուղղությամբ էլ կրակեն, բնականաբար, մի երեխա կվախենա»,- ասաց գյուղապետը։
Իսկ կրակոցները, Բադիրյանի խոսքով, գյուղում պարբերական բնույթ են կրում և ամեն անգամ շուրջ 5 րոպե տևում։
«Մենք գուցե մի փոքր ավելի պասիվ ենք ինֆորմացնելու առումով, Բերդի տարածաշրջանն ավելի ակտիվ է, բայց նույն չափով մեզ մոտ էլ են կրակում։ Պարզապես մենք շատ չենք ուզում նեղություն տալ։ Դե որ սահմանում ենք, սահմանում ենք»,- ասաց գյուղապետը։
