Հայաստանում ոչ մի բիզնես չի փակվելու, ոչ մի բիզնես, գործարան, ունեցվածք չի խլվելու։ Այս մասին այսօր՝ օգոստոսի 17-ին պաշտոնավարման 100 օրն ամփոփող հանրահավաքի ժամանակ ասաց վարչապետ Նիկոլ Փաշինյանը։
Վարչապետը կարևորեց ներդրումների ներգրավումը։ «Ես կոչ եմ անում աշխարհի հայության ներկայացուցիչներին, բոլոր ներդրողներին գալ Հայաստան և կատարել լրջագույն ներդրումներ, որովհետև ՀՀ-ում հաստատված է օրենքի գերակայություն»,- ասաց Փաշինյանը։
Նիկոլ Փաշինյանը վստահեցրեց, որ ոչ մի բիզնես չի փակվելու, ոչ մի բիզնես, գործարան, ունեցվածք չի խլվելու: «Սա կարևոր բան է, սա նշանակում է, որ մենք կարևորում ենք սեփականության անձեռնմխելիությունը։ Մենք երաշխավորում ենք ներդրումների անձեռնմխելիությունը։ ՀՀ–ում բիզնեսով զբաղվող որևէ մեկը անհանգստանալու որևէ առիթ չունի։ Այն բիզնեսմենները, ովքեր մարդ չեն սպանել, ովքեր նախկինում գործել են հին կանոններով նրանք հնարավորություն կունենան բարեհաջող գործել, զարգանալ և զարգացնել Հայաստանի Հանրապետությունը, նրանք հնարավորություն կունենան նոր ներդրումներ անել»,- ասաց նա։
Ըստ Փաշինյանի՝ նախկին իշխանությունները թերահավատություն են սերմանում. «Հիմա էլ ՀՀԿ-ները, հակահեղափոխականները լուրեր են տարածում, որ ներդրումները չեն գալիս և սպասում են, թե ինչ է լինելու։ Ոչ մի բան էլ չի լինելու, և այն, ինչ եղել է, արդեն եղել է, և հայ ժողովրդի հաղթանակը անշրջելի է»։
