Փոքրիկ Նատալիի՝ սահմանը հսկող հայ զինվորին ուղղված նամակը, որը բազմաթիվ սրտեր էր հուզել, որը զինվորին այդպես էլ չէր հասել ու ինչ-ինչ պայմաններում մնացել էր գեներալի ուսադիրներ կրող Մանվել Գրիգորյանը թաքստոց-պահեստարանում, վերջապես տեղ է հասել ու արդեն պատասխան ստացել.
«Բարև, իմ սիրելի, իմ փոքրիկ քույրիկ՝ Նատալի: Հուսով եմ, որ դու լավ ես, ու ժպտում ես քո անուշ, մանկական ժպիտով: Կներես, որ քո սրտի թրթիռով գրված նամակին ստիպված եղա այսքան ուշ պատասխանել: Ուղղակի, քո նամակը շատ երկար ճանապարհ անցավ, փաստորեն: Հուսով եմ, ինձ կներես, չէ՞ որ ես անչափ ուրախացա, երբ կարդացի քո նամակը: Շատ շնորհակալ եմ քեզ այս նամակի համար, շնորհակալ եմ լավ խոսքերի ու վստահության համար, իմ լավ քույրիկ: Ես ու իմ ընկերները անչափ հպարտ ենք, որ ծառայելով մեր հայրենիքին, պաշտպանում ենք նաև քեզ ու քո ընկերներին: Հրա՛շք փոքրիկներ, չէ՞ որ, դուք եք մեր ապագան ու հայրենիքի ապագա պաշտպանը»,- այս տողերով է սկսվում զինվորի նամակը:
Տեսանյութն ու լուսանկարներն «Ավրորային» է ուղարկել Նատալիի մայրիկը, ով մեզ հետ զրույցում նշեց, որ նամակը գրել են զորամասում ծառայություն իրականացնող զինվորները, որոնցից մեկն էլ նաև այցելել է աղջկան:
Հիշեցնենք, որ ավելի վաղ «Ռադիո Ավրորայի» եթերում Նատալիի հետ հեռախոսազրույց էինք ունեցել, որը Արցախում լսել են նաև պատասխան նամակը գրած զինվորները:
Իհարկե, Մանվել Գրիգորյանի պահեստներում շատ ավելի շատ նամակներ կային, որոնք գրել էին երեխաները և որոնք, ցավոք, տեղ չեն հասել: Նատալիի տողերը, կարծեք թե, վերածվեցին մի հավաքական նամակի, որն արտահայտում էր Ապրիլյան պատերազմի ժամանակ բոլոր երեխաների ապրումները:
