Կառավարության վերջին նիստում Նիկոլ Փաշինյանն անդրադարձել էր վարկային ծրագրերին, «որոնք չեն իրագործվում, նույնիսկ չեն մեկնարկել, երբեմն կիսատ են մնացել, ընդ որում՝ կիսատ են մնացել ուրիշների կողմից պարտավորությունները չկատարելու պատճառով: Այդ վարկային ծրագրերով Հայաստանը վճարումներ է իրականացնում. այս իրավիճակը մենք պետք է խորությամբ հասկանանք և քննարկենք»:
Նիկոլ Փաշինյանը նախարարներին հանձնարարել է իրենց գլխավորած նախարարությունների մասով պարզել նմանատիպ ծրագրերի թիվը և դրանց ցանկը ներկայացնել վարչապետի աշխատակազմ: «Սա մի իրավիճակ է, որ մենք խորությամբ պետք է հասկանանք, առնվազն տարօրինակ իրավիճակ է, չեմ ուզում վերջնական գնահատականներ տալ», ասել է նա:
Ինչ վարկային ծրագրեր են՝ վարչապետը չի ասել: Ենթադրվում է, որ դրանք արտաքին վարկային ծրագրեր են, որի դիմաց Հայաստանը վճարում է: Ընդ որում, պետք է ենթադրել, որ խոսքը բավական մեծ գումարների մասին է, եւ դատելով վարչապետի խոսքից, այդ վիճակն առաջացել է ոչ կառավարության մեղքով:
Հայտնի է, որ վարկային միջոցները նախկին իշխող համակարգի սնուցման աղբյուրներից մեկն էր տրանսֆերտների հետ միասին: Այս գումարները անվտանգության բարձիկի դեր էին խաղում համակարգի համար, որի միջոցով ապահովվում էին քվոտաների կայունությունը եւ գերշահույթները:
Այսօր Քննչական կոմիտեն տարածել է հաղորդագրություն հանքարդյունաբերության ոլորտում բացահայտված սխեմայի վերաբերյալ:
«ՀՀ տարածքում հանքարդյունաբերությամբ և երկրաբանահետախուզական աշխատանքներով զբաղվող 19 ընկերությունների բաժնետոմսերը տարբեր ժամանակներում ձեռք են բերվել մի քանի անձանց և կազմակերպությունների կողմից ու վաճառվել Կայմանյան կղզիներում գտնվող կազմակերպություններին։ Ընդ որում, 17 ընկերության բաժնետոմս վաճառվել է մեկ արտասահմանյան ընկերության»։
Ըստ կոմիտեի, նախնական տվյալներով՝ Հայաստանում գրանցված ընկերությունների և ակտիվների սեփականությունը և դրանց տնօրինումն իրականացվում է միևնույն կենտրոնից, ինչի հետևանքով հանքարդյունաբերության ոլորտում գործող բազմաթիվ կազմակերպություններ հայտնվել են մեկ կազմակերպության կառավարման տակ, ինչը հանգեցրել է ապրանքային շուկաներում մրցակցության կրճատմանը և կենտրոնացվածության մեծացմանը:
Հարուցվել է քրեական գործ՝ ՀՀ քրեական օրենսգրքի 195-րդ հոդվածի 1-ին մասով (Ապօրինի մենաշնորհային գներն արհեստական բարձրացնելը կամ իջեցնելը, կամ պահպանելը, ինչպես նաև մրցակցությունը սահմանափակելը նախնական համաձայնությամբ կամ համաձայնեցված գործողությունների միջոցով, որն ուղղված է շուկան տարածքային սկզբունքով բաժանելուն, այլ տնտեսվարող սուբյեկտների շուկա մուտք գործելուն խոչընդոտելուն, տնտեսվարող այլ սուբյեկտներին շուկայից դուրս մղելուն, խտրական գներ սահմանելուն կամ պահպանելուն):
Հայաստանում սկիզբ առած բացահայտումները շատերն անվանում են շոու: Կա նաեւ տեսակետ, որ այդ բացահայտումներն առայժմ կոռուպցիայի դեմ համակարգային պայքար չեն, այլ առանձին դրվագներ: Հնարավոր է, հնարավոր է նաեւ շոուի տարրեր կան, բայց այսօր այդ շոուն ավարտվեց: Այս երկու հաղորդագրությունները վերաբերվում են արդեն լուրջ, համակարգային սխեմաներին, որոնց մոտ գեներալ Մանվելը կամ Սերժի Վաչոն կարող են թվալ «մանր գրպանահատներ»:
Ընդ որում, երկու դեպքում էլ կարծես թե գործ ունենք սխեմաների միջազգային ընդգրկման հետ, որն ավելի է լրջացնում իրավիճակը: